მიმდინარე წლის 1-ელ სექტემბერს, ვენეციის საერთაშორისო კინოფესტივალზე კინორეჟისორ ტოდ ფილიპსის სურათის, „Joker“-ის პრემიერა შედგა. „გოთემ სიტის“ ნომერ პირველი ბოროტმოქმედის შესახებ ახალმა სურათმა, პრემიერაზე მყოფი საზოგადოება აღტაცებული დატოვა. მოყვარულები თუ კრიტიკოსები, განსხვავებულად აქებდნენ ფილმს, რეჟისორს და განსაკუთრებით კი მთავარი როლის შემსრულებელს, ხოაკინ ფენიქსს.
– „ ჯოკერი თანაბრად ეფექტური და შემაშფოთებელი ფილმია, პირდაპირი და ტრაგიკული. ფენიქსის მიერ შესრულებული „კრიმინალი ჯამბაზი“ ამაღელვებელი საყურებელია, სრულფასოვანი, უნაკლო… ეს მისთვის წარმოუდგენელი წარმატებაა, რომელიც აღნიშნავს მისი უკვე ზეადამიანური კარიერის მწვერვალს“. აღნიშნა პრემიერაზე დამსწრე ერთ-ერთმა კრიტიკოსმა.
ფილმის პრემიერამდე, ხოაკინ ფენიქსის მიერ ოსკარის ნომინაციაში გამარჯვების შესახებ ჩუმჩუმად კულუარებში საუბრობდნენ, თუმცა ახლა, ჩურჩული უკვე ყვირილში გადაიზარდა და დამიჯერეთ დამსახურებულად.
-“მე ახლაც არ მჯერა, თუ როგორი კარგია „Joker“, ეს შედევრია… სასაცილო, ბნელი, მუქი, ლამაზი, მრისხანებით აღსავსე, ერთი სიტყვით ძალიან მაგარი. ხოაკინ ფენიქსი კი ყველაფერის მიზეზია, ის არის ოსტატი და ყოველი მისი გამოჩენა ფენომენალურია“.
თუ ვიმსჯელებთ მხოლოდ პრემიერის მონაცემებითა და ადგილზე გაკეთებული შეფასებებით, ტოდ ფილიპსისა და ხოაკინ ფენიქსის მიერ შექმნილი ფილმი გრანდიოზულია და ნამდვილი შედევრია. პრემიერაზე დამსწრე საზოგადოება სურათს დადებითად აფასებს და ხოაკინ ფენიქსის მიერ შესრულებულ „ჯამბაზს“, კინოსამყაროს ერთ-ერთ ყველა დროის საუკეთესო, ბნელ და მუქ ბოროტმოქმედად ასახელებენ.
შეგახსენებთ, რომ ფილმში მოვლენები, არტურ ფლეკის (A.K.A ჯოკერი) ადრეული ცხოვრების ისტორიაზე 70-იანი და 80-იანი წლების დროს ვითარდება. „ჯამბაზი“ ოცნებობს გახდეს წარმატებული კომიკოსი, თუმცა მას რიგი მენტალური პრობლემები აფერხებს, მათ შორის, ემოციური აშლილობა, რომელიც არაკონტროლირებად სიცილს იწვევს. ის იმედაცრუებული ადამიანია, რომელიც ბევრჯერ ცდილობდა სოციუმთან ინტეგრაციას, თუმცა უშედეგოდ, საზოგადოება უარყოფდა მას. ამასთან იგი ნარცისია, რომელიც წარმოიდგენს, თუ როგორ დგას „სამყაროს ცენტრში“, იპყრობს ყურადღებას და ხვდება „გვიანი ღამის შოუში მიურეი ფრანკილნთან“ (რობერტ დე ნირო).
მათ ვინც ვენეციის საერთაშორისო კინოფესტივალზე მოხვდნენ გაუმართლათ და ჰქონდათ შესაძლებლობა ენახათ ხოაკინ ფენიქსის მიერ უნაკლოდ შესრულებული „მეფედ მონათლული კრიმინალი ჯამბაზი“, ხოლო მათ ვინც პრემიერაზე დასწრების საშუალებას მოკლებული ვიყავით, თვეზე ოდნავ მეტის დაცდა მოგვიწევს, რადგან ტოდ ფილიფსის შედევრს 4 ოქტომბრიდან კინოთეატრებში გააშუქებენ.
