უკანასკნელი წლების მანძილზე გილერმო დელ ტორო თავდაუზოგავად მუშაობდა, რათა მუნჯი დამლაგებლისა (სალი ჰოუკინსი) და ამფიბიის (დუგ ჯონსი) სიყვარულის ამბავი მაყურებლამდე მიეტანა. შეიძლება ითქვას, რომ მას შრომა ნამდვილად დაუფასდა. წყლის ფორმამ დიდი წარმატება მოიპოვა ოქროს გლობუსის დაჯილდოებაზე და დადებითი გამოხმაურებები მიიღო კრიტიკოსებისა თუ მაყურებლისაგან.
რაც მთავარია, ის ოსკარის 13 კატეგორიაშია ნომინირებული, რაც წლევანდელ დაჯილდოებაზე ნამდვილი რეკორდია. საინტერესოა, თუ რამდენ ოქროს ფიგურას წაიღებს “წყლის ფორმა” კინოაკადემიიდან. ამას სულ რამდენიმე დღეში შევიტყობთ, მანამდე კი ერთად გავეცნოთ 10 უცნობ ფაქტს ფილმის შესახებ:
1. გილერმო დელ ტორომ ფილმზე მუშაობა 2011 წელს დაიწყო
როგორც ცნობილია, ეს იდეა მას ერთ-ერთი საუზმის დროს დაებადა, რომელსაც მწერალ დანიელ კრაუსთან ერთად მიირთმევდა.
2. ამფიბიის ინსპირაცია მან ფილმ “შავი ლაგუნადან” მიიღო
რამდენიმე წლის წინ მას ამ ფილმის რიმეიქის გადაღებაც კი სურდა, თუმცა, სტუდიის აღმასრულებლებმა მისი ინიციატივა დაიწუნეს.
3. დელ ტორომ ფილმში საკუთარი ინვესტიცია ჩადო
სანამ წყლის ფორმა სტუდიამდე მიაღწევდა, რეჟისორმა თავად იმუშავა სცენარსა და ამფიბიის დიზაინზე, რაც მას 200 000$ დაუჯდა.
4. ფილმმა ოქროს გლობუსის ისტორიაში რეკორდული რაოდენობის ნომინაციები მოიპოვა
საბოლოოდ კი, 7 ნომინაციიდან 2 გამარჯვება ერგო – საუკეთესო რეჟისორისა და საუკეთესო მუსიკის კატეგორიებში.
5. წყლის ფორმა შავ-თეთრი ფილმი უნდა ყოფილიყო
თუმცა რეჟისორს ამ ჩანაფიქრზე უარის თქმა მოუხდა, რადგან ფერადი ფილმი მას გაცილებით დიდ შემოსავალს მოუტანდა.
6. ფილმის პრემიერა იმ კინოთეატრში შედგა, სადაც გადაღებები მიმდინარეობდა.
კინოთეატრი, რომლის თავზეც ფილმის მთავარი გმირი ცხოვრობს (და რომელსაც წყალდიდობას მოუვლენს, სანამ საკუთარ აბაზანაში ამფიბიასთან სიყვარულითაა დაკავებული), 1913 წელს აშენდა და ტორონტოში მდებარეობს.
7. ელიზას გვარი მის ობლობაზე მიუთითებს
ფილმში ჩვენ ვერ ვხვდებით მთავარი გმირის ოჯახს ან ნათესავებს. საინტერესოა ის დეტალი, რომ მისი გვარი ესპოსიტო იტალიურიდან ითარგმნება როგორც “დაუცველი” და ამ ტერმინს მიტოვებული ან გაშვილებული ბავშვების აღსაწერად იყენებდნენ.
8. ფილმში ოქტავია სპენსერის პერსონაჟი მისი სხვა როლების სიმბოლოებითაა წარმოდგენილი
ელიზას მეგობარი ზელდა, რომელსაც ოსკაროსანი მსახიობი განასახიერებს, გვაგონებს მის პერსონაჟებს ფილმებიდან მოსამსახურე და დამალული ფიგურები. როგორც მოგვიანებით სპენსერმა აღნიშნა, ის მერხის როლსაც კი შეასრულებდა, თუ ამას დელ ტორო სთხოვდა.
9. Fox Searchlight-ის აღმასრულებელმა პროდიუსერებმა ფილმის გამო იტირეს
როდესაც რეჟისორმა სტუდიას თავისი იდეა სკეჩებითა და დიზაინით წარუდგინა, მოსმენილითა და ნანახით გუნდის ყოველი წევრი იმდენად აღელდა, რომ შეხვედრის ბოლოს ცრემლებს ვერავინ იკავებდა.
10. ჰოუკინსი და ჯონსი ერთმანეთს სიყვარულში განუწყვეტლივ უტყდებოდნენ
ფილმის მთავარი გმირები პროფესიონალი მსახიობები არიან, თუმცა გადაღებებზე ისინი მაინც ძალიან ღელავდნენ და, როგორც სალი იხსენებს, ყოველი სცენის წინ ერთმანეთს უმეორებდნენ: “მე შენ მიყვარხარ! მადლობელი ვარ, რომ აქ ხარ!”
