თანამედროვე მსოფლიო კინოინდუსტრიის დიდებულ მსახიობებს თუ ჩამოვთვლით, მოწინავე რიგებში აუცილებლად იქნება კრისტიან ბეილი. მსახიობის უსაზღვრო ტალანტსა და შესაძლებლობებში ეჭვი უკვე აღარავის ეპარება და ეკრანებთან მოკალათებული მაყურებელი მის მორიგ ფილმს და წარმოუდგენელ ტრანსფორმაციას ყოველთვის დიდი ინტერესით ელის.
კრისტიან ბეილი არასდროს უშინდება გამოწვევებს, სირთულეებისთვის ყოველთვის მზად არის და ამა თუ იმ როლის სრულყოფისთვის ექსტრემალურ პირობებზეც თანხმდება. ამ ყველაფრის გათვალისწინებით, ბუნებრივია, რომ მისი სამსახიობო კარიერაც შესანიშნავად წარიმართა და ბავშვობიდან დღემდე მან არაერთ საინტერესო პროექტში მიიღო მონაწილეობა.
სინემანია გთავაზობთ კრისტიან ბეილის 10 საუკეთესო როლს (ნუმერაცია პირობითია):
1. მზის იმპერია
სტივენ სპილბერგის მიერ 1987 წელს გადაღებულ ისტორიულ დრამაში “მზის იმპერია” კრისტიან ბეილის პერსონაჟი 12 წლის ჯიმ გრემია, რომელიც მეორე მსოფლიო ომის დროს იაპონური არმიის ტყვეობაში აღმოჩნდება. პატარა ბიჭის წინ ახალი და მკაცრი რეალობა იშლება, სადაც ბავშვური უმანკოებისთვის ადგილი აღარ რჩება – ის ვალდებულია გაიზარდოს და მძიმე დაბრკოლებები სულ მარტომ გადალახოს. პატარა ბეილი ჯიმ გრემის გულის მოკვლელ ამბავს დიდი სამსახიობო ოსტატობით გვიყვება და ასეთ პატარა ასაკში მაყურებელს შესანიშანვ შესრულებას სთავაზობს. ფილმმა ოსკარის ექვსი ნომინაცია დაიმსახურა და პატარა, უაღრესად ნიჭიერი კრისტიან ბეილი კინომოყვარულების ფართო აუდიტორიის წინაშე წარადგინა.
2. მემანქანე
2004 წლის ბრედ ანდერსონის ფსიქოლოგიურ თრილერში “მემანქანე” კრისტიან ბეილი სამსახიობო ოსტატობის ახალ საფეხურზე ავიდა. ქარხნის მუშის, ინსომნიით შეპყრობილი ტრევორ რეზნიკის როლისთვის მსახიობმა წონაში დაახლოებით 30 კილო დაიკლო. გასაოცარ ფიზიკურ ტრანსფორმაციასთან ერთად, არანაკლებ მნიშვნელოვანი იყო ბეილის ემოციური გამომსახველობა. ხოლო, ამ ორი მთავარი ელემენტის კომბინაციის შედეგად კი, მსახიობმა ძალიან დამაჯერებელი, საინტერესო და დასამახსოვრებელი პერსონაჟი შექმნა.
3. შავი რაინდის ტრილოგია
მიუხედავად იმისა, რომ ჰოლივუდს სუპერგმირებზე გადაღებული არაერთი ფილმი, სერიალი თუ ანიმაცია ახსოვს, ქრისტოფერ ნოლანმა DC კომიქსების თაყვანისმცემლებს დაუვიწყარი ტრილოგია აჩუქა. შეიძლება ითქვას, რომ ნოლანმა 2005-2012 წლებში თავიდან შექმნა ბეტმენის ისტორია და მაყურებელს სრულიად განსხვავებული ბრიუს უეინი წარუდგინა. ალბათ, ბევრმა არ იცის, რომ თავად ბეილსაც ძალიან უნდოდა ბეტმენის როლის შესრულება. 2000 წელს, ერთ-ერთი მეგობრის მეშვეობით მსახიობს გრაფიკული ნოველა ჩაუვარდა ხელთ და იმდენად მოეწონა, რომ თავის აგენტს სთხოვა – თუ ვინმე ბეტმენის შესახებ ფილმის გადაღებას დააპირებდა, აუცილებლად ეცნობებინა მისთვის.
4. პრესტიჟი
ქრისტოფერ ნოლანის “პრესტიჟი” ნამდვილად არის იმ ფილმების რიცხვში, რომელსაც რაც უფრო ხშირად უყურებ, თითქოს მით უფრო უკეთესი ხდება. ფილმი ორი ილუზიონისტის მეტოქეობის ისტორიას გვიამბობს. მათი დაპირისპირება და შთამბეჭდავი ტრიუკებით ორთაბრძოლა საშიშ და სახიფათო სახეს იღებს. ამ სამკვდრო-საციცოცხლო ბრძოლაში კრისტიან ბეილის და ჰიუ ჯეკმანის შესანიშნავი შესრულება ნოლანის მიერ შექმნილ სამყაროს კიდევ უფრო დაძაბულსა და სრულყოფილს ხდის.
5. განთიადის იმედი
ვერნერ ჰერცოგის მიერ ვიეტნამის ომის შესახებ გადაღებულ დრამაში “განთიადის იმედი” კრისტიან ბეილი აშშ-ის მებრძოლ პილოტს თამაშობს, რომელიც მისი თვითმფრინავის ჩამოგდების შემდეგ ტყვედ ჩავარდება. ბეილის გმირს შიმშილის, ავადმყოფობისა და წამების გაძლება და გადალახვა უწევს, თუმცა ტყვეობიდან თავის დაღწევის შანსს მაინც მოთმინებით ელოდება. მსახიობს ამ როლისთვისაც მოუწია წონაში დაკლება, თუმცა ეს სულაც არ იყო ერთადერთთი მსხვერპლი, რომელიც მან ამ როლისთვის გაიღო – ერთ-ერთი სცენის გადაღებისას მსახიობმა ცოცხალი მატლებიც მიირთვა.
6. მატარებელი იუმასკენ
ჯეიმს მანგოლდის 2007 წლის სურათში “მატარებელი იუმასკენ” კრისტიან ბეილის გმირი, რანჩოში მცხოვრები ომის ვეტერანია, რომელმაც რასელ ქროუს გმირი -ბანდიტი და კრიმინალი ბენ უეიდი სამართალდამცავებს უნდა გადასცეს. პერსონაჟების საინტერესო თავგადასავალი და მსახიობების შესანიშნავი შესრულება იმ აუდიტორიისთვისაც კი მიმზიდველი აღმოჩნდა, ვისაც ვესტერნის ჟანრის ფილმები დიდად არ იტაცებს.
7. ამერიკელი ფსიქოპათი
მიუხედავად იმისა, რომ კრისტიან ბეილის ტალანტი მაყურებელმა მის ბავშვობისდროინდელ ფილმებშიც იხილა, 2000 წელს გადაღებულმა კრიმინალურმა თრილერმა ამერიკელი ფსიქოპათი მსახიობის მრავალმხრივ ნიჭსა და შესაძლებლობებს კიდევ ერთხელ გაუსვა ხაზი და ახალი შემოთავაზებებისკენ გზა გაუხსნა. გადაღებების დაწყებამდე კი, საქმე სულ სხვაგვარად იყო: მას აფრთხილებდნენ, რომ თუ კარიერული თვითმკვლელობა არ სურდა, ამ ფილმში მთავარი როლი არ შეესრულებინა. მსახიობს აზრადაც არ მოსვლია უარის თქმა და როგორც აღმოჩნდა, ეს გადაწყვეტილება სწორი იყო. მიუხედავად იმისა, რომ ფილმთან დაკავშირებით კრიტიკოსების აზრი დღესაც ორად იყოფა, იმაზე ნამდვილად ყველა თანხმდება, რომ კრისტიან ბეილის შესრულება ფენომენალური იყო.
8. მებრძოლი
რეალურ ისტორიაზე დაფუძნებული 2010 წელს გადაღებული ბიოგრაფიული დრამა “მებრძოლი” ბოქსიორ მიკი უორდზე გვიამბობს, რომელმაც მსოფლიო ჩემპიონობის მოსაპოვებლად ურთულესი გზა გაიარა. კრისტიან ბეილი მიკი უორდის ძმის – დიკის როლს ასრულებს, რომელიც ასევე პროფესიონალი ბოქსიორი იყო. გადაღებების დაწყებამდე, ბეილი რეალური დიკისგანაც იღებდა რჩევებს და მასთან კონსულტაციებს საკმაოდ დიდ დროს უთმობდა. მსახიობს ამ როლისთვისაც მოუწია წონაში დაკლება, რადგან დიკი ნარკოდამოკიდებული ბოქსიორი იყო და ეს მის ფიზიკურ სხეულზეც აისახებოდა. კრისტიან ბეილის შესანიშნავი შესრულება კინოაკადემიას შეუმჩნეველი არ დარჩენია და მსახიობმა მეორეხარისხოვანი როლის საუკეთესოდ შესრულებისთვის ოსკარიც დაიმსახურა.
9. ამერიკული აფერა
დევიდ ო. რასელის ათ ოსკარზე ნომინირებული კრიმინალური დრამა “ამერიკული აფერა” კრისტიან ბეილის მრავალფეროვან ფილმოგრაფიაში განსაკუთრებულ ადგილს იკავებს. სურათის ეკრანებზე გამოსვლის შემდეგ მსახიობმა განაცხადა, რომ ფილმის დიდი ნაწილი იმპროვიზაციის შედეგი იყო. პროფესიონალი თაღლითის – ირვინ როზენფილდის როლის შესანიშნავად შესრულებისთვის 2014 წელს მან ოსკარის მეორე ნომინაციაც მიიღო.
10. დიდი შემცირება
კრისტიან ბეილის კიდევ ერთი შესანიშნავი შესრულება და შედეგად, ოსკარის მესამე ნომინაცია! ადამ მაკეის 2016 წლის დრამაში “დიდი შემცირება” ბეილის გმირი უოლ სტრიტის გურუ, ექსცენტრიული პიროვნება მაიკლ ბარია, რომელმაც წინასწარ განჭვრიტა ამერიკის იპოთეკური კრიზისი და შედეგად, დიდი ფული იშოვა.
შეგახსენებთ, რომ ამავე რეჟისორის, ადამ მაკეის ფილმისთვის Vice კრისტიან ბეილი 2019 წლის ოსკარის რიგით 91-ე დაჯილდოებაზე მთავარი როლის შემსრულებელი მსახიობი კაცის კატეგორიაშია ნომინირებული.
მოამზადა ნინო დოლიაშვილმა
წყარო: variety.com; cheatsheet.com
