როცა თხოვდებით, გჯერათ, რომ თქვენი ქორწინება სამუდამოდ გაგრძელდება (თუ, რა თქმა უნდა, საქმრო მშობლების მიერ არაა არჩეული მატერიალური მდგომარეობის, საგვარეულო შტოსა თუ სხვა კრიტერიუმთა მიხედვით). ქორწინება არ არსებობს პრობლემების გარეშე, თუმცა ეს პრობლემები არაფერია იმ ყოვლად დამპლურ მომენტთან შედარებით, როცა შენი ქმარი, რომელიც შენთვის თეთრ ცხენზე ამხედრებული პრინცი, ჯეიმს ბონდი თუ არაღიარებული სტარკი იყო, გტოვებს. ამ დროს სამყარო თავზე გენგრევა და სრულიად ლეგიტიმურად ხდები მიგდებული, -1000-იანი თვითშეფასებით.
გთავაზობთ 5 სერიალს, რომელიც მსგავსი ჩამპალი მდგომარეობიდან ამოსვლაში დაგეხმარებათ:
სექსი დიდ ქალაქში
რა თქმა უნდა, პირველ რიგში, ეს სექსი დიდ ქალაქშია – 4 განსხვავებული ქალის ნიუ-იორკული ცხოვრება – წვეულებებით, ბევრი ფლირტითა და სიყვარულით; პირადი თუ ქალური პრობლემების განხილვით. ამ ექვს-სეზონიანმა შოუმ რეალურად შეცვალა ქალების ცხოვრება მთელს მსოფლიოში და დღეს უკვე საკულტო სერიალადაა აღიარებული.
სასოწარკვეთილი დიასახლისები
4 განსხვავებული ქალია სასოწარკვეთილი დიასახლისების სიუჟეტის ცენტრშიც. თუმცა, ამ სერიალში გაცილებით უკეთაა წარმოჩენილი ყოველდღიური რუტინა და ის პრობლემები, რომელიც ქორწინების ლამაზი ფასადის მიღმა არსებობს. ეს ასევე საკულტო სერიალია ქალებზე, რომლებიც ღიმილის უკან მალავენ სასოწარკვეთას, ოჯახურ პრობლემებს, დათმობილ კარიერას, პირად ტკივილს, და მხოლოდ მაშინ იხსნიან ნიღბებს, როცა ერთად იკრიბებიან პოკერის სათამაშოდ.
ახალგაზრდა
სერიალის მთავარი გმირი პირდაპირი მნიშვნელობით ქმრისგან მიგდებული ქალია, რომელიც სრულიად მარტო რჩება ფინანსური თუ სხვა რთული პრობლემების წინაშე. 40 წლის ლიზას, რომელსაც ოჯახის გამო წლებია არ უმუშავია, უწევს, ცხოვრება ნულიდან დაიწყოს. ის მრავალ დაბრკოლებას ეჯახება, მაგრამ რწმენას არ კარგავს და თანდათან იღებს ყველაფერს, რისკენაც ისწრაფოდა.
როგორ გავეყაროთ ქმარს
ექიმი ჰაუსის ლიზა კადი (ლიზა ედელშტეინი) აქ სულ სხვა ამპლუაში გვევლინება. როგორ გავეყაროთ ქმარს მოგვითხრობს შუახნის ქალზე, რომელიც საკუთარი თავისა და რეალური სურვილების კვლევას იწყებს. ის ქმარს გაცილებული მეგობრებისგან იღებს რჩევებს, რაც მოულოდნელობებითა და გამოწვევებით აღსავსე ცხოვრებისკენ უბიძგებს.
უსირცხვილო
ერთი შეხედვით, ალბათ, უჩვეულო მოგეჩვენებათ უსირცხვილოს დასახელება ამ ხუთეულში, მაგრამ შესაძლოა ჩამოთვლილთაგან სწორედ უსირცხვილო დაგეხმაროთ ყველაზე მეტად. რატომ? იმიტომ, რომ ნახავთ, რომ თქვენზე ჩამპალი – გაცილებით ჩამპალი მდგომარეობაც არსებობს. არსებობენ გალაგერები – არა ოცნების ამერიკიდან, არამედ ამერიკული გეტოდან, რომლებიც რეალობის ყველაზე სასტიკ მხარეს იცნობენ; რომლებიც შორს დგანან ილუზიებისგან და ყველა შესაძლო გზით იბრძვიან თვითგადარჩენისთვის, და თუ საქმე მაინც და მაინც დაშორებაზე მიდგება, ამ სერიალში ბევრი მეთოდია ნაჩვენები, რასაც შეგიძლიათ მიტოვების შემთხვევაში მიმართოთ. მაგალითად, გამოთრობას და ღრიალს, ნივთების მტვრევას, შუა ქუჩაში მატყუარა კაცის ბოძზე გაკვრას და ასე შემდეგ და ასე შემდეგ…
ისე კი, მთელი ამ სერიალების ყურებას, სჯობს, გამოიპრანჭოთ და სადმე წახვიდეთ. ფიონა გალაგერივით გამოთრობა თუ ქერი ბრედშოუსავით ფლირტი აუცილებლად დაგეხმარებათ, საკუთარი თავის ახალი მხარეები აღმოაჩინოთ და თავი ნამდვილ ქალად იგრძნოთ.
