სათაურის გამო, შეიძლება, წარმოიდგინეთ, რომ კოლექცია კომედიებს აერთიანებს, მაგრამ ასე არაა. აქ სხვადასხვა ჟანრისა და პერიოდის ფილმებია, რომელთა მთავარ გმირებსაც ნამდვილად აქვთ იმის მიზეზი, რომ უჟმურები იყონ. ათივე სურათი კი ბრწყინვალე ნამუშევარია, რომელიც არ უნდა გამოტოვოთ, განსაკუთრებით – უჟმურებმა:
გრან ტორინო (2008)
ასაკოვან უჟმურ კაცს, რომელიც ომის ვეტერანია და თავისი მყარი პრინციპები აქვს, სამეზობლო ამ პრინციპებზე უარის თქმას აიძულებს. ის კი ჯიუტად იცავს იმას, რისიც სწამს. ეს საკმაოდ სევდიანი სურათია, რომელიც თანამედროვე სამყაროს დესტრუქციულ მოვლენებზე გვესაუბრება.
მძებნელები (1956)
ყველა დროის ერთ-ერთ საუკეთესო ვესტერნად მიჩნეული მძებნელები მოგვითხრობს ისტორიას ომის ვეტერანზე, რომელიც კომანჩების მიერ გატაცებულ თავის დისშვილს ეძებს. ხოლო როცა იპოვის, აღმოაჩენს, რომ გოგონამ სრული ასიმილაცია განიცადა კომანჩების ტომთან…
ცხოვრება წყალქვეშ (2004)
როდესაც მის მეგობარს ზვიგენი იმსხვერპლავს, დოკუმენტური ფილმების რეჟისორი წყალქვეშა ექსპედიციას იწყებს შურისძიების მიზნით და ათას უბედურებას გამოცდის. უეს ანდერსონის ბრწყინვალე ფილმი, მთავარ როლში – ბილ მიურეით, თქვენზე საოცარ შთაბეჭდილებას დატოვებს.
ცუდი სანტა (2003)
მაღაზიის გაქურდვის მიზნით, კრიმინალი სანტად იწყებს მუშაობას. თუმცა, გეგმები იცვლება, როცა უჟმური და უპრინციპო მთავარი გმირი ბავშვს დაუმეგობრდება.
სევიჯები (2007)
რა უნდა ქნათ, როცა თქვენი მოხუცი, უჟმური მამა გაჭედავს? და-ძმა, რომელთაც დიდი ხანია, ურთიერთობა აღარ ჰქონიათ, მის აზრზე მოსაყვანად ერთიანდება. თუმცა, ეს არც ისე მარტივია, მითუმეტეს, იმის გათვალისწინებით, რომ წარსულის აჩრდილები კვლავ ბრუნდებიან.
ამერიკული ბრწყინვალება (2003)
ფილმი, სადაც ერთმანეთს ერწყმის რეალობა და გამოგონილი სამყარო, კომიქსების ცნობილი ავტორის და დიდი უჟმურის – ჰარვი პეკარის უჩვეულო ცხოვრებაზე გვიყვება.
უცნაური წყვილი (1968)
ცოლთან დაშორების შემდეგ, ფილმის მთავარი გმირი საცხოვრებლად მეგობართან გადადის. მეგობრობის მიუხედავად, ისინი ტემპერამენტითა და ხასიათით ერთმანეთისგან განსხვავდებიან, რაც დიდი გაუგებრობისა და მუდმივი კამათის მიზეზი ხდება.
სტრეიტის ამბავი (1999)
მიუხედავად იმისა, რომ წლებია ურთიერთობა აღარ ჰქონია, როდესაც ძმის ავადმყოფობის შესახებ შეიტყობს, უჟმური სტრეიტი მის მონახულებას გადაწყვეტს. მართვის მოწმობის არქონის გამო კი, ამ მოგზაურობას ბალახის საკრეჭი მანქანით შეუდგება.
სულის სიმტკიცე (2010)
მამის მკვლელობის შემდეგ, 14 წლის გოგონა მკვლელის მოსაძებნად თავებზე მონადირეს ქირაობს და თვითონაც მიჰყვება ამ ხიფათით აღსავსე მოგზაურობაში. სქესის, ასაკისა და ხასიათის სხვაობის მიუხედავად, მათ ერთი დიდი საერთო ნიშანი აქვთ – სულის სიმტკიცე.
ზაზუნას დღე (1993)
და კვლავ ბილ მიურეი – ამჯერად უჟმური და ეგოცენტრული სატელევიზიო წამყვანის როლში, რომლის ცხოვრებაშიც მეტად უჩვეულო მოვლენა იწყება: ერთი და იგივე დღე დაუსრულებლად მეორდება. მთავარი გმირი უკვე შეშლილობის ზღვარზეა, თუმცა, საბოლოოდ, ეს ყველაფერი მის პიროვნებაში საოცრად პოზიტიურ გარდატეხას შეიტანს.
